Интервју со Марија Најдовска, единствената дипломирана жена трубач во Македонија.
Кога ќе кажете Скопје, кои мисли и слики Ви се појавуваат?
Кога ќе се каже Скопје, ме асоцира на љубов и ми се појавува слика од топол дом. Убави приказни проживеани на секое катче, слободен дух, носталгични чувства и убава енергија. Тука живееме скромно, но среќно.
Кое Скопје го сакате повеќе – ова сега или тоа од порано?
Го сакам Скопје во секој облик, но би рекла дека повеќе го сакам ова Скопје сега, бидејќи сум емотивно врзана за него. Сум слушала за старото Скопје и ми изгледа дека било посмирено и со повеќе зеленило, но не сум живеела во тоа време, па тоа им го препуштам на другите да го доловат. За мене, денешното Скопје е магично и посебно.
Скопје и скопјани даваат и плаќаат, но дали институциите и градоначалниците доволно му даваат на градот?
Не можам да кажам дека сме задоволни со тоа колку му се дава на градот. Чест на исклучоците кои навистина напорно работат и се трудат да променат нешто на подобро, но потребни се поголем труд, одговорност и сплотеност. Секогаш има простор за напредок и за подобрување на животната средина, а тоа бара визија, соработка и искрена грижа за градот и неговите луѓе.
Дали Вие доволно му дадовте на градот?
Јас лично се трудам да бидам активен и одговорен граѓанин, да внимавам на чистотата, но секако, секогаш има простор за поголем труд. Сметам дека секој треба прво да тргне од себе и да размисли како се однесува со средината околу себе, затоа што секој може да придонесе за подобро Скопје. Ситниците водат до големи промени, а малите навики создаваат посилна заедница.
Со што најмногу се гордеете во Скопје?
Способноста да се издигне од урнатини. Скопје носи траги од разни времиња кои раскажуваат за длабока и богата историја. Имаме одлична храна, жив и топол социјален живот, а најмногу се гордеам со луѓето – колку се талентирани и паметни, со нивната издржливост, дух, топлина и способност да функционираат и во хаос.
Преголемо ли е Скопје за Вас, треба да расте или да се намали
Според мене, населението во Скопје дефинитивно треба да се намали, затоа што градот е пренаселен – се доселуваат и оние што треба, и оние што не треба. Веќе има преголема гужва од секој аспект: за живеење, за сообраќај, за работни места, па дури и за основна инфраструктура.
Што ви недостига во градот, а што би одзеле?
Ми недостига сплотеност кај народот, повеќе зеленило, чист воздух, функционален јавен превоз кој би бил навремен. Ми недостига исто така посилен културен живот, настани што ќе го направат градот жив и поврзан.
Би одзела од непланската урбанизација што го гуши градот — зградите никнуваат без ред, без доволно простор помеѓу нив, без зеленило, без паркинзи.
Во какво Скопје би сакале да живеете?
Сакам да живеам во Скопје каде што младите ќе остануваат, не заминуваат, каде што ќе има ред, правда и можности за сите. Град што не се продава за лични интереси, туку се гради со љубов и совест. Скопје што гордо ја чува својата историја, а мудро го гради својот пат кон иднината —чисто, зелено и достоинствено.
