Министерката за финансии Гордана Димитриеска-Кочоска го повика економскиот тим на опозицијата на средба во Министерството за финансии, со цел, како што истакна, јавно да се презентираат фактите и реалната состојба во македонската економија.
Таа оцени дека во јавноста се пласираат неточни информации и погрешни толкувања за економските состојби, нагласувајќи дека економските политики треба да се темелат на конкретни показатели, а не на политички оценки.
Според министерката, во периодот од 2017 до 2024 година просечниот економски раст изнесувал околу 1,8 проценти, додека јавниот долг пораснал од 4,78 милијарди на околу 9 милијарди евра. Таа посочи дека актуелната Влада наследила високо ниво на задолженост и нарушена финансиска состојба, но оти сега економијата бележи раст од над три проценти, зголемување на платите и повисоко ниво на инвестиции.
Димитриеска-Кочоска истакна дека Министерството води внимателна политика за управување со јавниот долг и паралелно работи на сервисирање на старите обврски и финансирање на развојни проекти. Според неа, во изминатиот период биле обезбедени повеќе од 1,2 милијарди евра за отплата на претходни задолжувања.
Таа нагласи дека државата навремено ги сервисира обврските што доспеваат во 2025 и 2026 година, додека истовремено обезбедува средства за капитални инвестиции, раст на платите и пензиите и одржување на економската стабилност.
Во однос на критиките од опозицијата, министерката оцени дека тие се базираат на неточни интерпретации на јавно достапни податоци и порача дека економските резултати ќе бидат најдобар одговор на политичките обвинувања.
