Општина Делчево официјално ја започна постапката за изработка на сообраќајна студија со идеен сообраќаен проект и анализа, која треба да ги утврди можностите за воведување зонско паркирање на подрачјето на градот.
Договорот со компанијата „24 ИНГ“ ДООЕЛ увоз-извоз Битола, избрана како најповолен понудувач во постапката за јавна набавка, го потпиша градоначалникот Иван Гоцевски.
Студијата ќе содржи детална стручна анализа за организацијата на паркирањето, предлог-решенија за воведување зонско паркирање, како и мерки за подобрување на сообраќајниот режим, особено во централното градско подрачје. Во рамки на проектот ќе биде изработен и идеен сообраќаен проект, кој треба да понуди најсоодветни решенија согласно реалните потреби и услови во Делчево.
Рокот за изработка на студијата е 12 месеци, а вредноста на договорот изнесува 600.000 денари без пресметан ДДВ.
Од Општина Делчево истакнуваат дека со овој проект се прави значаен чекор кон воспоставување поуреден систем на паркирање и подобра организација на сообраќајот, при што сите идни решенија ќе бидат засновани на стручни анализи и проектна документација.
Градоначалникот Иван Гоцевски нагласи дека целта е Делчево да добие современи и функционални решенија за подобро искористување на расположливиот простор во централното градско подрачје. Според него, уредениот сообраќај и регулираното паркирање ќе придонесат за помал метеж, поголема безбедност и поквалитетно секојдневие за граѓаните.
