Трагична сообраќајна несреќа се случи вчера попладне на патниот правец Битола – Прилеп, кај местото викано „Туланата“, при што животот го загуби 17-годишна девојка, а уште четири лица, меѓу кои и седумгодишно дете, се повредени.
Според информациите од Министерството за внатрешни работи, во несреќата учествувале патничко возило „Опел“ со битолски регистарски ознаки, управувано од Е.Ф. (28) од прилепското село Канатларци, и патничко возило „Форд“ со битолски регистарски ознаки, зад чиј волан бил М.Н. (48) од селото Долно Српци, општина Могила.
Од здобиените повреди на местото на несреќата починала 17-годишна сопатничка од возилото „Опел“, а смртта ја констатирал лекар од Итната медицинска помош во Битола.
Со тешки телесни повреди се здобиле возачот на „Опел“, Е.Ф., како и 44-годишната Д.Н. и седумгодишно дете, кои биле сопатници во возилото „Форд“. Повредите им биле констатирани во Клиничката болница во Битола.
Повреди се здобил и возачот на „Форд“, М.Н., кој исто така бил пренесен на лекарски преглед.
Увид на местото на несреќата извршила увидна екипа на СВР Битола, а причините за трагичниот судир се утврдуваат.
