Да најдеш во Центар место за паркирање е многу тешка работа. Сега паркирањето таму стана и скапа работа, оти општина Центар ги зголеми цените на паркинг просторот.
Чуден начин најде општината за да го реши хаосот со паркирањето. Наместо да се градат нови паркинг места, граѓаните ќе плаќаат повеќе за истиот проблем.
Центар со години се дави во недостиг на паркинг, улиците се претрупани, тротоарите окупирани, а нервозата кај возачите расте. Во таква ситуација, зголемувањето на цените изгледа како најлесна, но дали и најправилна мерка? Градоначалникот Горан Герасимовски ветуваше решенија, но наместо нови гаражи и организиран систем, граѓаните добиваат поскапи дневни и месечни карти.
Повеќе Центарци почнаа да искажуваат незадоволство од оваа одлука. На социјалните мрежи веќе се најавуваат и потпишување на петиции. Граѓани негодуваат што немало јавна расправа по ова прашање и бараат поништување на поскапувањето и повеќе праркинг места.
Како ќе постапи општина Центар останува да се види. Но, едно е веќе видливо, пред се потребни се повеќе паркинг простори, а на постојните е потребно подобра услуга и редовно одржување.
