Потпретседателката на Главниот одбор на Српската напредна странка (СНС), Ана Брнабиќ, обвини дека се подготвува „хајка за апсење“ на претседателот на Србија, Александар Вучиќ.
Таа оцени дека целта на постапката не е утврдување на одговорноста за трагедијата во Нови Сад, туку, како што тврди, политичко отстранување на Вучиќ.
Брнабиќ реагираше преку социјалната мрежа „Икс“ по информациите за можноста Вучиќ да биде сослушан и евентуално уапсен во рамките на истрагата за уривањето на настрешницата на железничката станица во Нови Сад.
„Ветуваа револуционерен терор, гледаме револуционерен терор“, напиша таа, обвинувајќи дека Вучиќ бил мета на напади и невистини за време на изборниот молк, вклучително и за неговото семејство.
Брнабиќ праша зошто, според неа, не биле сослушани или осомничени членовите на Ревизионата комисија, за кои тврди дека го контролирале проектот и дале согласност без дополнителни проверки.
Таа посочи дека Вучиќ се поврзува со случајот поради информациите што ги имал за реализацијата на проектот, но оцени дека истрагата има политичка заднина.
„Овде целта е да се замолчи и отстрани Александар Вучиќ, а не да се дојде до правда“, порача Брнабиќ и најави дека СНС ќе се спротивстави на, како што го нарече, „револуционерниот терор“.
Во јавноста засега нема потврда дека е донесена одлука за апсење на Вучиќ, ниту се наведени конкретни обвиненија против него во рамките на овој случај.
