Од синоќа почнаа активно да снимаат камерите на улиците на Скопје од системот „Сејф сити“. Од синоќа веќе полицијата почна до возачите преку мајл или СМС порака да испраќа опомени за сторени прекршоци кои ги забележале камерите.
Еден скопјанец испрати до нашата редакција таков записник коментирајќи:
„Синоќа се враќав од Петровец и амо што влегов дома во Аеродром на електронска пошта ми стигна записник дека сум сторил прекршок пред само 20-тина минути. Беше точно наведено местото на влезот во Скопје како и точното време кога сум возел со брзина од 63 километри на час на место каде е дозволено 50“, ни објасни аеродромецот додавајќи дека уредно биле напишани сите податоци од возилото, која камера го сторила снимањето на прекршокот и кога сета таа апаратура била баждарена.
Во документот стои дека возачот е казнет со 45 евра, но на целиот домумент јасно е напишано со големи букви дека овој пат се работи за ОПОМЕНА.
„Ја пофалувам брзината и точноста на полициската активност, браво за ова. Го поддржувам овој начин на воведување ред во сообраќајот и од денес многу повеќе ќе внимавам“, ни напиша аеродромецот.
Инаку, системот „Безбеден град, безбедна држава“ автоматски ги регистрира прекршоците во сообраќајот и веднаш ги санкционира прекршителите. Тест-периодот, како што најавија од МВР ќе трае до Нова година, а со почетокот на 2026 година почнува казнувањето.
Во почетната фаза системот ќе регистрира пречекорена брзина, минување на црвено светло, возење без важечка сообраќајна дозвола и непрописно паркирање и тоа не само во Скопје за почеток и во Тетово и Куманово.
