Министерката за енергетика Сања Божиновска оствари важна средба во Белата куќа со Џерод Аген, заменик-советник на претседателот Доналд Трамп и извршен директор на Националниот совет за енергетска доминација на САД, при што во фокусот биле стратешките насоки за унапредување на енергетската соработка меѓу двете земји.
Божиновска информираше дека разговорите биле отворени и суштински, со јасно дефинирани приоритети – енергетската безбедност, диверзификацијата на изворите на енергија и реализацијата на конкретни инфраструктурни проекти. Таа нагласи дека средбата има особена тежина, имајќи предвид дека станува збор за висок функционер со директен увид во креирањето на американските енергетски политики.
Според неа, ваквиот дијалог отвора простор за подлабока и поконкретна соработка, која може да резултира со заеднички проекти од стратешко значење, насочени кон долгорочна стабилност и развој, не само на Северна Македонија, туку и на целиот регион.
Средбата е дел од поширокиот процес во рамки на Стратешкиот дијалог меѓу САД и Северна Македонија, каде, како што посочи Божиновска, државата настапува како сериозен партнер со јасно поставени приоритети и визија за идниот енергетски развој.