Собранието, на предлог на гувернерот на Народната банка, д-р Трајко Славески, ја избра Арљинда Хасани Синани за нова вицегувернерка на Народната банка. Нејзиниот мандат ќе трае седум години.
Арљинда Хасани Синани е дипломирана економистка со повеќе од две децении професионално искуство во банкарскиот сектор. Во текот на својата 22-годишна кариера работела на бројни стручни и раководни позиции, стекнувајќи искуство во кредитирањето, управувањето со ризиците, корпоративното банкарство и развојот на деловните процеси.
Професионалниот пат го градела во две од најпознатите банки во земјава – „Прокредит банка“ АД Скопје и „Стопанска банка“ АД Скопје. Од 2023 година ја извршувала функцијата регионален директор за Северозападниот Регион во „Стопанска банка“, каде што раководела со работењето на повеќе експозитури и била одговорна за развојот на деловните активности во регионот.
Нејзиното искуство опфаќа и работа во области поврзани со регулаторната и супервизорската рамка, управувањето со ризици, корпоративното управување и носењето стратешки одлуки, а во текот на кариерата била дел и од повеќе комисии и управувачки тела во банкарските институции во кои работела.
Од Народната банка оценуваат дека со изборот на Арљинда Хасани Синани дополнително се зајакнува професионалниот капацитет на институцијата и се создаваат услови за континуирано и ефикасно спроведување на нејзините законски надлежности.
Како што се наведува, целта останува одржување на стабилен, сигурен и отпорен финансиски систем, како и обезбедување поддршка за одржлив економски раст и развој на државата.
