Американскиот претседател Доналд Трамп изјави дека Соединетите Американски Држави веќе извојувале победа во конфликтот со Иран, кој трае повеќе од осум месеци, но нагласи дека воените операции сè уште не се завршени.
Говорејќи на одбележувањето на Денот на ветераните на Националните гробишта Арлингтон во Вирџинија, Трамп порача дека Вашингтон ќе одлучи кога ќе биде ставен крај на конфликтот.
„Се боревме силно и победивме. Само е прашање кога сакаме да ја завршиме војната“, изјави Трамп.
Тој потенцираше дека САД нема да ги прекинат операциите додека не бидат исполнети сите поставени цели, додавајќи дека Вашингтон не се стреми кон „делумна победа“.
„Сакаме да бидеме сигурни дека сме постигнале целосна победа, а не победа од 93 проценти. Тоа ќе биде целосна победа“, рече американскиот претседател.
Трамп повтори дека, според него, САД не ја започнале војната, туку дека Иран води непријателска политика кон Америка уште од Исламската револуција во 1979 година.
Во говорот се осврна и на последиците од конфликтот, наведувајќи дека 18 американски војници ги загубиле животите, како и дека американските напади значително ги ослабнале иранските воени капацитети и нуклеарната програма.
И покрај неговите изјави за победа, војната официјално не е завршена. Американските сили и понатаму се распоредени во регионот, поморската блокада против Иран останува во сила, а дипломатските разговори меѓу Вашингтон и Техеран засега не донесоа конкретен напредок.
Во меѓувреме, иранскиот министер за надворешни работи Абас Арагчи порача дека конфликтот не може да заврши само со воена сила и санкции, оценувајќи дека САД ќе мора да пристапат кон преговори доколку сакаат трајно решение.
