Проектот „Безбеден град“ ќе се прошири со мобилни камери за контрола на брзината, како и со уреди вградени во полициските возила, кои ќе може да регистрираат сообраќајни прекршоци и додека се во движење – најави денеска министерот за внатрешни работи, Панче Тошковски и додаде дека целта е возачите да бидат свесни дека може да бидат откриени доколку ги прекршат сообраќајните правила, без оглед на тоа каде се движат.
Според предлозите на експертите, постојните полициски возила треба да се опремат со камери што ќе ја мерат брзината на возилата во движење, а се планира и набавка на мобилни камери, кои ќе се поставуваат на таканаречените црни точки, односно на локациите на кои најчесто се случуваат сообраќајни несреќи со загинати и тешко повредени лица.
Министерот најави и дека системот „Безбеден град“ во првата недела од декември официјално ќе почне да се применува и на подрачјето на СВР Струмица, а следни се подрачјата на СВР Штип и СВР Битола, а до февруари системот треба да биде воведен на целата територијата на државата.
