ВМРО-ДПМНЕ обвини дека СДСМ се обидува преку, како што велат, повторување на невистини да го пренасочи вниманието на јавноста од сопствената политичка одговорност.
Портпаролот на владејачката партија, Валентин Манасиевски, на денешната прес-конференција оцени дека обвинувањата на опозицијата за наводни влијанија од српските власти претставуваат „замена на тези“.
„Кај Филипче и СДС работи ефектот на илузорната вистина. Тие се длабоко уверени дека ако една лага ја повторат 1.000 пати, таа некако ќе стане вистина. Таков е и случајот со нивните илузорни вистини за Вучиќ и за српскиот свет“, изјави Манасиевски.
Тој се осврна и на периодот кога СДСМ беше на власт, потсетувајќи на соработката на тогашното раководство со српскиот претседател Александар Вучиќ.
Според Манасиевски, поранешните функционери на СДСМ имале блиски односи со Вучиќ, а како пример ги наведе средбите, посетите и политичката соработка во тој период.
„До пред неколку години, кога беа власт Заев и Филипче го величаа Вучиќ и му се поклонуваа на граница кога им донираше вакцини. Го шетаа по македонските винарии, му подаруваа македонски дресови и му се извинуваа ако во Македонија кажеше некаков лош збор за него“, рече портпаролот на ВМРО-ДПМНЕ.
Тој додаде дека лица блиски до Вучиќ, како што наведе, Александар Обрадовиќ и Зоран Башановиќ, по доаѓањето на Зоран Заев на власт биле ангажирани како советници во Владата.
Манасиевски ја повика СДСМ, наместо да се занимава со изборни процеси во соседството, да побара предвремени избори во Македонија доколку смета дека има поддршка од граѓаните.
„Наместо да слават за победа на избори на друга партија во друга држава, нека си го средат својот двор. Ако се подготвени за избори, нека ги побараат, а не да бегаат од нив“, порача тој.
Портпаролот на ВМРО-ДПМНЕ оцени дека политичките промени во Македонија започнале со заминувањето на претходните раководства на СДСМ и порача дека тој процес ќе продолжи.
„На прашањето кое го поставува Филипче – кој е следен, имаме многу лесен одговор. Филипче, ти си следен“, заклучи Манасиевски.
