Три возила биле опожарени во текот на изминатата ноќ во Скопје, во два одделни случаи, информира Министерството за внатрешни работи.
Првиот пожар бил пријавен во раните утрински часови, околу 03:05 часот, на улицата „Џон Кенеди“. Според пријавата, било опожарено патничко возило „Мерцедес“ со скопски регистарски ознаки, сопственост на 54-годишниот З.И. од Скопје.
Во инцидентот нема повредени лица, а пожарот бил изгаснат од екипа на Бригадата за противпожарна заштита на Град Скопје.
Неколку часа подоцна, околу 06:05 часот, во СВР Скопје бил пријавен уште еден случај на опожарување возила, овојпат на улицата „Финска“.
Таму бил запален автомобил „Шевролет Каптива“ со кумановски регистарски ознаки, сопственост на 40-годишниот Д.Н. од Куманово, а огнот се проширил и на паркирано возило „Фолксваген Голф 4“ со скопски ознаки.
И во овој случај нема повредени лица, а пожарот бил локализиран од противпожарната екипа.
Од МВР информираат дека се преземаат мерки за целосно расчистување на двата случаи.
