Ако барате брз, вкусен и заситен ручек, оваа запечена комбинација од млад компир, тиквички и сланина е вистински погодок. Подготовката е едноставна – состојките се редат во слоеви, се прелеваат со павлака за готвење, се посипуваат со рендан кашкавал и се печат до совршена златна коричка.
Крајниот резултат е сочен и ароматичен оброк, во кој крцкавата сланина, меките компири и тиквичките се спојуваат во богат и кремаст вкус.
Потребни состојки
500 грама млад компир
2 мали тиквички
200 грама сланина
4 чешниња лук
120 милилитри павлака за готвење
100 грама тврдо сирење или кашкавал
Провансалски зачини по вкус
Сол
Мелен црн пипер
Малку растително масло
Начин на подготовка
Измијте ги тиквичките, исечете ги на тенки кругови, посолете ги и оставете ги околу 10 минути да ја испуштат вишокот течност. Потоа добро исцедете ги.
Лукот исечкајте го на тенки парчиња, сирењето изрендајте го, а сланината исечете ја на мали коцки или тенки ленти.
Компирите добро измијте ги, исечете ги на тенки кругови и ставете ги во сад. Додадете сол, бибер и провансалски зачини, па добро измешајте.
Намастете огноотпорен сад со малку масло. На дното наредете слој тиквички, врз нив распоредете ги лукот и сланината, а потоа покријте со слој компири.
Прелијте со павлаката за готвење, покријте со алуминиумска фолија и печете во претходно загреана рерна на 180 степени околу 30 до 35 минути, додека компирите не омекнат.
Потоа извадете ја фолијата, посипете со ренданото сирење и вратете во рерна уште околу 10 минути, додека не се формира крцкава и златножолта коричка.
