Министерот за локална самоуправа Златко Перински во рамки на караванот „Каде што срцето е дома“ оствари работна посета на Општина Кисела Вода, каде што се сретна со градоначалничката Бети Стаменкоска-Трајкоска, членовите на Советот и претставници на општинската администрација.
На средбата се разговараше за тековните проекти, развојните приоритети на општината, реализацијата на капиталните инвестиции и можностите за дополнително зајакнување на административните капацитети со цел поефикасно извршување на надлежностите и подобрување на услугите за граѓаните.
Посебен акцент беше ставен на Ресурсниот центар за поддршка на општините, преку кој Министерството за локална самоуправа обезбедува стручна, техничка и советодавна помош во различни сегменти од работењето на локалните самоуправи.
Перински истакна дека директната комуникација со општините е клучна за навремено препознавање на предизвиците и креирање ефикасни решенија.
„Нашата определба е да бидеме постојан партнер на општините и да обезбедиме конкретна поддршка таму каде што е најпотребна. Преку Ресурсниот центар создаваме механизам што ќе им помогне на општините полесно да ги надминуваат административните и техничките предизвици и поефикасно да ги реализираат своите развојни цели“, изјави Перински.
Тој нагласи дека Владата продолжува со поддршка на локалниот развој преку капитални инвестиции, посочувајќи дека за Општина Кисела Вода, преку двата владини јавни повици, се одобрени вкупно 24 проекти во вредност од 528,5 милиони денари.
Градоначалничката Бети Стаменкоска-Трајкоска оцени дека соработката меѓу централната и локалната власт е од суштинско значење за успешен развој на општините.
„Денешната посета претставува можност за суштински дијалог за предизвиците и стратешките цели на Кисела Вода. Разговаравме за конкретни модели на поддршка од Министерството, а особено значајно е што на располагање ни е ставен Ресурсниот центар за поддршка на развојот на општините. Тој претставува дополнителна алатка што ќе ни помогне уште поуспешно да ги подготвуваме и реализираме идните проекти“, изјави Стаменкоска-Трајкоска.
Од Министерството за локална самоуправа најавуваат дека и во наредниот период ќе продолжат со непосредни средби и посети на општините со цел унапредување на соработката и поттикнување на локалниот развој.
