Водно денеска ќе биде центар на спортот, рекреацијата и добрата атмосфера, каде ќе се одржи 14-тото издание на традиционалната манифестација „Sparkasse Life – Прв до врв“.
Настанот и оваа година се очекува да привлече голем број љубители на активниот живот и спортот, кои ќе учествуваат натпреварувачки или рекреативно во повеќе дисциплини.
Во програмата се вклучени планинско трчање, друмски и планински велосипедизам, Е-bike трка, како и специјална тимска трка за компании.
Стартот на велосипедските дисциплини е закажан за 9:45 часот кај Музеј на град Скопје, додека трките во трчање ќе започнат во 10:00 часот.
Учесниците ќе се движат низ неколку контролни точки сè до врвот на Водно, каде традиционално завршува манифестацијата.
Организаторите посочуваат дека главната цел на настанот е промоција на спортскиот дух, дружењето и престојот во природа, а сите што успешно ќе ја завршат патеката ќе добијат финишер медал.
За најдобрите натпреварувачи се обезбедени награди во повеќе категории, како и специјални бонуси за евентуално соборување рекорди.
По завршувањето на трките, на врвот на Водно ќе следува музичка и забавна програма со диџеј, настап во живо и освежување за посетителите.
