Талентираните младинци се надеж за секое општество. На Македонија не и недостасуваат талентирани ученици, напротив тие често не радуваат со своите меѓународни успеси.
Последен таков голем успех е освојувањето два бронзени медала на престижната Менделеев олимпијада по хемија во Москва. Средношколците – Теона Ана Георгиевска од „Јахја Ќемал” од Скопје, и Даниел Христов од „Славчо Стојменски” од Штип покажаа дека имаме таленти кои се меѓу најдобрите во светот.
Браво!!!
Инаку, ова не е единствен скорешен пример. Во март, млади македонски таленти освоија златен и сребрен медал на меѓународната олимпијада по роботика на Крит. Македонија едноставно е полна од умен потенцијал.
Но, дали македонската држава е полна со разбирање, подготвеност и стратегија да им помогне на талентите уште повеќе да се развиваат? Се прави ли доволно или најмногу е оставенено на самите таленти и нивните ментори, кои најчесто волонтерски работат за дополнителен развој на надарените деца?
Граѓаните очекуваат повеќе да се прави за талентите.
Време е институциите посериозно да создаваат вистински услови за развој на младите умови, а потоа и да ги задржиме во Македонија. Без талентирани, а со премногу просечни на раководни места не му се пишува добро на општеството.
