„Македонска пошта“ може да ја врати својата функционалност во навремената достава на пратките, преку набавката на 100 нови возила, откако последниве години приматот го презедоа низа приватни компаниите особено со растечкиот интерес кај граѓаните да порачуваат производи онлајн од странство.
Последните неколку години „Пошта“ се соочуваше со загуби во работењето, превработеност во администрацијата но и со фиктивни вработувања, но според директорот Орхан Куртиши работите се менуваат, па затекнатите 37 отсто во администрацијата се намалени, а минатата година започна кадровско доекипирање, а новите вработувањата ќе продолжат и оваа година бидејќи просечната старост на вработените е 55-56 години.
Подновениот возен парк на „Пошта“ ќе придонесе повеќе да не се трупаат стотици илјади неподелни пратки во магацините туку ќе се испорачуваат брзо и ефикасно до граѓаните, а универзалната поштенска служба ќе може да работи профитабилно. Владата со набавката на овие возила заштети околу 400000 евра, а наскоро се очекува и дигитализација на „Пошта“ и набавка на сортирка, најмодерна на Балканот.
