На 14 март (сабота) во 12 часот, Македонската филхармонија ќе го одржи симфонискиот концерт за деца „Магичната флејта на Вулфи“.
Авторка на приказната и нараторка на концертот е Тина Иванова, а на сцената ќе настапи и актерот Мартин Јордановски, миленик на најмладата публика. Диригент е маестро Иван Еминовиќ, а оркестарот ќе изведе избрани дела од богатиот опус на Волфганг Амадеус Моцарт.
„Магичната флејта на Вулфи“ е детска книга инспирирана од музиката на Моцарт, но со оригинална и автентична приказна. Таа го следи авантуристичкиот дух на малиот Вулфи и неговата необична средба со магичната флејта.
Преку палавштини, игри и љубопитни истражувања, Вулфи го открива светот околу себе. Во приказната се појавуваат и други интересни ликови – таткото, тетка Марија Лепка Лепенка, Трепкачкиот сосед чичко Франц и, секако, Магичната флејта.
Еден ден, љубопитноста ќе го одведе Вулфи во визбата на неговиот татко, каде што ќе ја открие магичната флејта. Нејзините звуци ќе му помогнат да ја оствари својата најголема желба – да стане славен музичар.
Претставата има забавен и едукативен карактер. Целта е најмладите да ја засакаат музиката на Моцарт и класичната музика воопшто, а истовремено да научат дека фантазијата и искрената желба можат да станат реалност.
