Во пресрет на Меѓународниот ден на жената, на 6 март во 10 часот во Детскиот културен центар – Карпош во Скопје ќе се одржи манифестацијата „Играм и пеам за мојата мајка“, под мотото „Љубов и насмевка за сите жени“.
Настанот е посветен на мајките и на сите жени, како израз на благодарност и почит за нивната улога во семејството и општеството.
Во рамки на програмата ќе биде отворена изложба на ликовни творби изработени од децата од градинките на Град Скопје. Преку своите цртежи и креативни изрази, најмладите ќе ја споделат љубовта и благодарноста кон своите мајки.
Организаторите посочуваат дека целта е да се поттикне кај децата чувство на почит кон жените, како и свест за еднаквост и вредностите што ги поврзуваат генерациите.
Специјален гостин на манифестацијата ќе биде Јасмина Атанасова-Симјаноска, првата оџачарка во Македонија. Таа ќе им се обрати на децата со порака за храброст, самодоверба и избор на професија без предрасуди.
Атанасова-Симјаноска, која е и дипломиран архитект, енергетски контролор и автор на учебници, ќе ја сподели својата животна приказна, нагласувајќи дека секој може да успее ако верува во себе и истрајно ги следи своите соништа.
