Националната опера и балет вечерва од 19.30 часот ќе ја изведе операта „Тоска“ од Џакомо Пучини, едно од најпознатите дела од светскиот оперски репертоар.
Претставата е во режија на Огњан Драганов од Бугарија, а диригент е гостинот од Италија, Џанлука Мартиненги. Сценографијата ја потпишува Зоран Николовски, додека костимографијата е на Марија Пупучевска.
Во насловната улога – Флорија Тоска – ќе настапи Злата Тошевска-Димовска. Улогата на Каварадоси ќе ја толкува Миша Шешаберидзе од Грузија, додека како Скарпија ќе настапи Леон Ким од Јужна Кореја.
Во останатите улоги ќе играат Игор Дурловски, Драган Ампов, Марјан Николовски, Кристијан Антовски, Никола Чедомировски и Десанка Глигоријевиќ, заедно со хорот и оркестарот на Националната опера и балет.
„Тоска“ е оперски трилер во три чина, во кој љубовта, љубомората и политичките интриги се испреплетуваат во драматична приказна со силен емотивен набој. Делото е создадено врз либрето на Луиџи Илика и Џузепе Џакоза, инспирирано од драмата на Викториен Сарду. Светската премиера се одржала во Рим во 1900 година, а повеќе од еден век подоцна „Тоска“ останува еден од најизведуваните оперски наслови во светот.
