Во централното градско подрачје на Скопје денеска ќе биде воведен посебен сообраќаен режим поради протестниот марш „Стоп за Цементара“, кој е закажан со почеток во 12 часот.
Од Министерството за внатрешни работи информираат дека маршот ќе започне пред зградата на Владата на булеварот „Илинден“, ќе продолжи десно по булевар „ВМРО“, потоа по улицата „Васил Главинов“, лево по „Димитрие Чуповски“, во продолжение по улицата „11 Октомври“ до пред Собранието, а потоа лево по улицата „Филип Втори Македонски“ до пред Министерството за животна средина.
Поради движењето на учесниците, Единицата за безбедност на патниот сообраќај при СВР Скопје ќе спроведе мерки за посебен режим на сообраќај во центарот на градот.
Од МВР упатуваат апел до сите учесници во сообраќајот да ги почитуваат насоките и наредбите што ќе ги издаваат полициските службеници на терен.
