Грипот ги полни болниците низ Македонија. Како последица на компликации од инфекцијата на Клиниката за инфективни болести во Скопје е регистриран првиот смртен случај. Во неделата починала е 75-годишна пациентка, а лабораториските анализи потврдиле присуство на вирусот Инфлуенца А.
На Клиниката за инфективни болести во моментов се хоспитализирани 25 пациенти, од кои двајца се во критична состојба и се поставени на респираторна поддршка.
Актуелната ситуација покажува дека грипот зема замав и влегува во фаза на широка трансмисија, што често се опишува како „галопирачки” тренд. Па оттука за очекување е надлежните да размислуваат и околу можноста за продолжување на зимскиот распуст за една недела, за да не се случи ширење на болеста кај учениците.
