Ново научно истражување укажува дека редовната консумација на чај или кафе може да има позитивно влијание врз здравјето на коските кај жените, особено во повозрасна доба.
Остеопорозата е чест здравствен проблем кај жените над 50 години – според податоците, секоја трета жена ќе биде дијагностицирана со ова заболување. Болеста предизвикува намалување на коскената густина, што ги прави коските кршливи, склони кон фрактури и со побавно заздравување.
Ризикот е особено зголемен кај постарите жени поради падот на нивото на естроген по менопаузата – хормон кој има клучна улога во одржувањето на здрави коски. Сличен ефект има и хируршкото отстранување на јајниците.
Истражувачи од Универзитет Флиндерс спровеле анализа на навиките за консумирање чај и кафе кај околу 9.700 жени од САД, постари од 65 години, во рамки на долгорочна студија за остеопороза.
Учесничките во период од десет години во четири наврати пополнувале прашалници за своите навики, додека здравјето на нивните коски било следено преку мерење на густината на коскените минерали (GMD) во пределот на колкот и вратот на фемурот, со помош на рендгенска технологија.
Резултатите покажале дека жените кои редовно пиеле чај имале нешто повисока коскена густина во споредба со оние кои не консумирале чај. Научниците сметаат дека овој ефект може да се должи на катехините – природни соединенија присутни во чајот, за кои се верува дека ги стимулираат клетките задолжени за градење на коските.
