Толеранцијата на камерите од системот „Безбеден град“ ќе биде иста како онаа што се применува кај останатите полициски радари. За брзини до 100 километри на час ќе има толеранција од шест километри, за брзини над 100 километри на час – осум километри, а за брзини над 200 километри на час – дванаесет километри. Ова вчера го соопшти министерот за внатрепни работи Панче Тошковски.
Тој кажа и дека во Скопје, каде што е дозволено возење до 50 км/ч, „Безбеден град“ ќе регистрира прекршок од 57 км/ч па нагоре. Но, сепак дообјасни дека оваа толеранција нема да важи во случаи кога ќе биде сторено кривично дело поврзано со сообраќајот.
Што се однесува до регистрирањето на системот „Сејф сити“ на службените возила, Тошковски информираше дека ќе се процесуираат и тие возила кога не се возат во рамки на оправдани оперативни дејствија.
– А кога службените возила ќе постапуваат во рамки на нивното оперативно делување, нема да бидат во систем. Тоа значи дека секое возило на Брза помош, Пожарна, МВР, Министерството за одбрана, при вршење службени дејствија нема да биде дел од системот, доколку тоа се оправда согласно целисходноста на нивното делување во рамки на нивното службено дејствие, истакна Тошковски.
