Пробното пуштање на полицискиот систем „Сејф сити” и објавувањето на фрапантните бројки на прекршоци веќе од третиот ден видливо ги скроти возачите низ Скопје. Почнаа повеќе да внимаваат на прописите.
Се очекува подобрувањето на сообраќајната култура да се зголемува со самото доближување на датумот од кога ќе почнат казнувањата. Поради сето ова системот на МВР има масовна поддршка меѓу граѓаните. Сите посакуваат конечно да има завидна безбедност на патиштата.
Сепак, не смее да се заборави дека за побезбеден сообраќај е потребно и улиците да немаат дупки. Треба и семафорите да се синхронизирани, а знаците логички поставени. Тротоарите треба да се слободни, пешаците да не поминуваат улица каде ќе им текне. Надвор од градовите сообраќајниците мора да се средени, тунелите осветлени, уништената сигнализација да е поправена.
И секако, присуството на полицијата на сообраќајниците мора да биде поголема од досега. Новиот систем не треба да значи дека тие треба да дремат во автомобилите. Таму каде што треба си има поставено лежечки полицајци, на другите места ни требаат исправени и будни припадници на МВР.
