Солидарноста и хуманоста се позитивни работи кои се многу нужни во Македонија. Затоа и беше убаво кога деновиве бевме сведоци како Клиниката за детски болести во Скопје прими донација од многу потребна медицинска опрема.
Хуманитарната акцијата „За нашите мали херои” треба да е пример и за други такви чекори. На многу места се потребни донации, помош, поткрепа. Многу поединци и организации во земјава можат и треба да прават хумани гестови.
Да, првично секаде каде е нужна помош треба да реагираат државните и општинските институции, но треба и граѓаните да си помагаат меѓусебно, да помагаат на заедницата. Постојат неколку хуманитарни организации кои со своите волонтери трчаат на сите страни, има и свесни поединци кои делуваат, но тоа не е доволно.
Сведоци сме на многу примери во земјава кога граѓаните масовно помагаат при големи катастрофи и дома и во странство, но што со некој овдешен случај на преживување на голема лична катастрофа? Имаме многу сограѓани и организации на кои им е потребна нашата хуманост.
Мора многу повеќе да се свртиме кон солидарноста. И да се запрашаме дали во јавноста се поприсутни хуманите луѓе или оние кои сакаат да грабнат туѓо?
