Скопје останува Европска престолнина на културата за 2028 година. Градоначалникот Орце Ѓорѓиевски успеал да ги убеди во Брисел дека нашиот главен град ќе се соземе од големата запуштеност која трае со години и ќе успее да ги постигне потребните стандарди.
Ќе се стаса ли за две години да се направи потребната трансформација?
Градоначалникот најави инвестиција од над 55 милиони евра во клучна инфраструктура. Ќе мора многу плански и брзо да се работи. Скопје сега е многу, многу далеку од она што треба да биде.
На фино средување чекаат Аквадуктот, Скопското Кале и Старата Чаршија. Има таму многу што да се сработи. Универзалната сала пак чека да биде обновена веќе одамна, таа беше храм на скопската култура. МКЦ исто така мора да биде светнат, а и музеите низ градот, Универзитетската библиотека и театрите.
Европска културна престолнина не се бива ако градот нема средени паркови и закрпени и чисти улици.
Ветувањето дека сето ова ќе се среди е дадено во Брисел. И скопјани го добија ветувањето пред изборите. Сега градоначалникот е на потег, мора брзо да работи.
