Фестивалот на регионални театри РУТА вечерва ќе биде затворен со гостување на Градскиот театар „Сартр“ од Сараево, кој во 20 часот ќе ја изведе претставата „За цел живот“, во режија на Јасенко Пашиќ.
Покрај режисерот, кој е и дел од актерската екипа, во претставата играат и Сеад Пандур, Аднан Кресо, Давор Сабо, Кемал Ризвановиќ и Дино Хамидовиќ.
Темата на претставата е длабоко поврзана со историјата на фудбалскиот клуб Железничар од Сараево, симбол на градот и неговата упорност.
„Сите нешта што се случувале во Сараево во последните сто години, поминувале и низ клубот Железничар. Кога градот згаснувал – згаснувал и клубот; кога градот се обновувал – се обновувал и клубот. Тоа не е само спорт, тоа е движење, емоција и вредносен систем,“ изјави режисерот Пашиќ.
Преку развојот на клубот, претставата паралелно ја следи и урбанизацијата на Сараево, прикажувајќи ја љубовта кон градот и идеалите што ги поврзуваат луѓето.
Писателот и драматург Бењамин Хасиќ објаснува дека делото е приказна за љубовта кон недофатливите нешта:
„Ова не е само приказна за фудбалот, туку за духот на Сараево, за тоа како една заедница опстојува преку љубов, страст и заедништво. Претставата ги разнишува предрасудите за фудбалските навивачи и ја покажува нивната човечност и искреност.“
Со „За цел живот“, РУТА завршува уште едно успешно издание, кое и оваа година го збогати театарскиот живот во Скопје со претстави од регионот исполнети со емоција, хумор и длабоки човечки приказни.
Фото: Принтскрин/Facebook
