Украинскиот претседател Володимир Зеленски заминува во Соединетите Американски Држави, каде што се очекува да оствари средба со американскиот претседател Доналд Трамп. Според најавите, разговорите ќе се одржат на маргините на Генералното собрание на Обединетите Нации во Њујорк, додека дипломатските тимови на двете земји ги финализираат деталите околу агендата.
Зеленски потврди дека веќе имал телефонски разговор со Трамп, при што било договорено двајцата лидери да се сретнат во Њујорк.
„Се договоривме да се сретнеме во Њујорк, а оваа средба може да донесе значајни промени. Постои дипломатска динамика“, изјави украинскиот претседател.
Тој посочи дека Киев подготвува конкретни предлози за деескалација на конфликтот, како и иницијативи поврзани со енергетската и прехранбената безбедност, заштитата на цивилното население и други клучни безбедносни прашања.
„Работиме заедно со американскиот тим и подготвени сме да преземеме навистина сериозни чекори“, нагласи Зеленски.
Според најавите, главни теми на средбата ќе бидат можностите за интензивирање на дипломатските напори за запирање на војната во Украина, безбедносните гаранции за земјата, дополнителната американска воена помош, вклучително и системи за противвоздушна одбрана, како и обезбедувањето сигурни коридори за извоз на енергенси и земјоделски производи.
Средбата се организира по серијата дипломатски посети на американски претставници во Киев и Москва. Од украинска страна оценуваат дека директната комуникација со Вашингтон на највисоко ниво отвора можност за нов дипломатски импулс во напорите за изнаоѓање решение за конфликтот.
Во рамки на Генералното собрание на ОН се очекува да се одржи и средба меѓу американскиот државен секретар Марко Рубио и рускиот министер за надворешни работи Сергеј Лавров.
Во меѓувреме, американскиот претседател Доналд Трамп утре ќе отпатува за Њујорк, каде што најпрво ќе има средба со градоначалникот Зохран Мамдани, пред почетокот на седницата на Генералното собрание на Обединетите Нации, која започнува во вторник.
