Општина Кисела Вода информира дека успешно се завршени градежните работи на уште еден дел од објектот „Кокиче“, кој функционира во состав на детската градинка „Весели цветови“.
Со најновата реконструкција, објектот е целосно обновен. Реновиран е средишниот, постар дел од градинката, кој опфаќа три занимални за деца на возраст од две до шест години, кујната, канцеларијата и ходникот.
Во рамки на работите целосно е отстранета старата ламперија, поставена е арматурна мрежа, израмнети и обработени се ѕидовите, поставен е нов плафон, а радијаторите се демонтирани, исчистени и бојадисани. Дополнително, поставено е и ново осветлување.
Од Општина Кисела Вода истакнуваат дека подобрувањето на условите во детските градинки останува еден од нивните главни приоритети.
„Со ова реновирање создаваме побезбедна, поздрава и попријатна средина за престој и едукација на најмладите. Нашата цел е секое дете да има квалитетни услови за раст и развој, а воспитниот кадар современ и функционален простор за работа“, соопштија од Општината.
