Осум лица се повредени во вооружен напад што утрово се случи пред стручното и техничко училиште „Тургутлу Инџи Узмез“ во областа Тургутлу, во турската провинција Маниса.
Според информациите од Канцеларијата на гувернерот на Маниса, инцидентот се случил околу 8 часот, кога непознато лице отворило оган во близина на училиштето. По пријавата, на местото веднаш пристигнале полициски и медицински екипи, а осомничениот напаѓач бил приведен од страна на полицијата.
Повредените лица биле транспортирани со возила на итната медицинска помош во Државната болница во Тургутлу. Според првичните информации, едно од ранетите лица се наоѓа во критична состојба.
Безбедносните камери го снимиле осомничениот како се движи по улицата со пушка во рацете, по што се оддалечува од местото на настанот.
По пукањето, пред училиштето пристигнале голем број вознемирени родители кои барале информации за своите деца. Полициските службеници го обезбедиле просторот и презеле мерки за смирување на ситуацијата и спречување дополнителна паника.
Областа околу училиштето останува под полициско обезбедување, а надлежните институции продолжуваат со истрагата за да ги утврдат мотивите и сите околности за вооружениот напад.
