Занаетчиската комора Скопје, во соработка со „Скопје Сити Мол“ и со финансиска поддршка од Град Скопје, од денеска до 13 септември ја организира манифестацијата „Денови на филигран“, посветена на промоција и зачувување на филигранството како еден од највредните традиционални занаети.
Посетителите ќе имаат можност да ја запознаат уникатната уметност на филигранот, да видат рачно изработени производи од филигранџии и да се запознаат со техниките, знаењето и вештините кои се потребни за создавање на овие автентични дела.
Целта на настанот е филигранската традиција да се доближи до пошироката јавност, особено до младите, но и да се покаже дека овој занает претставува повеќе од културно наследство.
Организаторите посочуваат дека филигранството има потенцијал и како современ креативен занает кој може да придонесе за развој на домашни уникатни производи, претприемништво и самовработување.
На едно место ќе бидат претставени повеќе занаетчии-филигранисти и нивните изработки, во кои традиционалните техники се комбинираат со модерен дизајн и современи трендови.
Од Занаетчиската комора Скопје нагласуваат дека преку оваа манифестација продолжуваат со активностите за поддршка на занаетчиите, промоција на занаетчиството и зачувување на традиционалните знаења и вештини за идните генерации.
