Во пратка со замрзнати малини испратена од Србија кон Франција е откриено зголемено присуство на кадмиум, тежок метал кој претставува сериозен ризик по човековото здравје. Според податоците објавени од Европската комисија преку системот за брзо предупредување за храна и добиточна храна (RASFF), нивото на контаминација било речиси двојно повисоко од дозволените граници.
Француските надлежни служби ја задржале пратката веднаш по лабораториските анализи, спречувајќи таа да се најде на пазарот. Информацијата била официјално објавена на 30 април, а случајот е означен како „сериозен ризик“ за потрошувачите.
Во анализираната пратка е утврдено присуство на 0,071 милиграми кадмиум по килограм малини, додека максимално дозволената граница во Европската унија изнесува 0,04 милиграми по килограм. Ова значи дека измерената вредност значително ја надминува безбедносната граница поставена за заштита на здравјето на потрошувачите.
Кадмиумот е познат како еден од најопасните тешки метали во синџирот на исхрана. Тој се акумулира во човечкото тело, првенствено во бубрезите и црниот дроб, а неговото исфрлање може да трае децении – од 10 до 30 години. Долготрајната изложеност се поврзува со сериозни здравствени последици, вклучувајќи оштетување на бубрежната функција, а Светската здравствена организација го класифицира како потенцијално канцероген.
Со оглед на тоа дека многу српски производи се увезуваат во Македонија, прашањето е дали од овие малини има пристигнато и кај нас. Ако од истиот призводител има од овие малини на македонскиот пазар, АХВ треба да реагира под итно и да направи соодветни проверки.
