Од ВМРО-ДПМНЕ обвинија дека СДСМ се обидува да ја избегне политичката одговорност за состојбата во Гостивар, иако, според нив, партијата заедно со градоначалникот Арбен Таравари и Лимани ја дели локалната власт и одговорноста за состојбите во општината.
На денешната прес-конференција, пратеникот и член на Извршниот комитет на ВМРО-ДПМНЕ, Миле Лефков, изјави дека СДСМ во изминатиот период не побарала одговорност од локалната власт, ниту ја признала сопствената политичка одговорност како партнер во управувањето со Гостивар.
„Еден месец СДС бега од вистината, а таа е дека заедно со Лимани ја делат локалната власт, а со тоа и одговорноста за Гостивар“, рече Лефков.
Од ВМРО-ДПМНЕ тврдат дека наместо да се соочи со проблемите и да преземе одговорност за кризата со водоснабдувањето, СДСМ продолжила со политички обвинувања кон владејачката партија.
Лефков оцени дека поради, како што наведе, неспособноста на СДСМ, ДУИ и Партијата на Таравари, Владата предводена од ВМРО-ДПМНЕ морала директно да се вклучи во надминување на проблемот.
„Додека СДС беше зафатена со ширење хистерија и броење чешми низ државата, Владата предводена од ВМРО-ДПМНЕ од прв момент беше со граѓаните на Гостивар и ги презеде сите мерки за надминување на кризата, а жителите секој ден бесплатно ги снабдуваше со вода“, изјави Лефков.
