ВМРО-ДПМНЕ преку соопштение обвини дека СДСМ и неговото раководство, како што велат од партијата, поради недостиг на политички идеи и конкретни решенија повторно се обидуваат да предизвикаат вознемиреност кај граѓаните преку ширење дезинформации.
Од владејачката партија тврдат дека лидерот на СДСМ, Венко Филипче, додека се наоѓа на одмор на Егејот, преку партиските структури давал насоки за ширење паника на социјалните мрежи во врска со квалитетот на водата во Скопје.
„Додека Венко Филипче и Зоран Заев се на одмор на Егејот, решиле да водат политика преку ширење дезинформации и создавање страв кај граѓаните“, наведуваат од ВМРО-ДПМНЕ.
Од партијата оценуваат дека информациите за наводна неисправност на водата во главниот град биле неодговорни, додавајќи дека надлежните институции реагирале и со официјални податоци ги демантирале тврдењата.
ВМРО-ДПМНЕ посочува дека Министерството за внатрешни работи презело активности за утврдување на потеклото на информацијата и евентуалната одговорност за нејзиното ширење.
„Филипче и СДСМ не треба да си играат ниту со довербата на јавноста, ниту со чувството на сигурност на граѓаните, а најмалку со прашања поврзани со нивното здравје“, се наведува во соопштението.
Од владејачката партија додаваат дека политичката борба, според нив, мора да има граници и го повикуваат СДСМ наместо, како што велат, „лаги и страв“, да понуди конкретни политики и решенија.
ВМРО-ДПМНЕ наведува дека Владата во моментов е фокусирана на економијата, инвестициите, зголемувањето на платите, инфраструктурните проекти и подобрувањето на животниот стандард, додека СДСМ го обвинуваат за враќање кон, како што велат, „старото сценарио на дезинформации и создавање хаос“.
