Владата размислува за намалување на данокот на додадена вредност (ДДВ) за горивата како дел од пакетот мерки за справување со растот на цените, потврди премиерот Христијан Мицкоски. Најавата доаѓа по две последователни поскапувања на горивата, предизвикани од кризата на Блискиот Исток и растот на цената на суровата нафта.
Мицкоски изјави дека Владата има јасен план и стратегија за справување со состојбата и дека анализите покажуваат оти нестабилноста во регионот може да потрае подолг временски период.
„Да, планираме. Имаме јасна стратегија, имаме јасен план. Според нашите анализи оваа состојба што се случува во Заливот може да потрае и неколку години“, изјави премиерот.
Тој нагласи дека сите чекори ќе се преземаат внимателно, со цел да не се наруши макроекономската стабилност, но истовремено да се обезбедат што е можно пониски цени на горивата за граѓаните и стопанството.
Според премиерот, Македонија располага со доволни резерви на нафта и нафтени деривати и во моментов нема простор за загриженост околу снабдувањето.
„Имаме доволно за да опслужиме конзум на нафта и нафтени деривати за 50-60 проценти од времето пред кризата“, рече Мицкоски.
Тој додаде дека државата продолжува да обезбедува гориво и за дел од соседните земји преку реекспорт и ги повика граѓаните да останат смирени.
Во однос на цените, Мицкоски оцени дека Македонија и понатаму има едни од најниските цени на горивата во регионот, наведувајќи дека дизелот е значително поевтин отколку во повеќе соседни држави.
Премиерот посочи и дека, и покрај зголемената потрошувачка на горива, економската стабилност е зачувана, а инфлацијата во јули изнесувала 2,3 проценти на годишно ниво.
Тој направи споредба со 2022 година, кога инфлацијата, според него, достигнала 16 проценти, оценувајќи дека актуелната Влада успеала да ја стабилизира економијата.
Осврнувајќи се на критиките од опозицијата, Мицкоски ги обвини политичките противници дека секојдневно шират, како што рече, лаги и конструкции, додавајќи дека е подготвен да носи и непопуларни одлуки доколку тие се во интерес на државата.
