Аерозагадувањето во Скопје е огромен проблем кој директно го нарушува здравјето на граѓаните. Ова мора да си го повторуваат надлежните служби дури и сега кога ветерот малку го подзачисти скопскиот воздух.
И не само да си го повторуваат туку и да делуваат на терен постојано. Проблемот со високозагадениот воздух не смее да се третира парцијално и со најави на некакви си идни мерки.
Прашањето е – што се прави сега, се вршат ли најавените засилени мониторинзи, се активираа ли дополнителни средства во буџетот за борба против загадувањето, се поправаат ли расипаните мерни станици, се проверува ли каков отпад се увезува и согорува?
Локалната и централната власт мораат понастојчиво да ги решаваат проблемите, а каде треба и да носат построги законски регулативи. Повременото доделување на неколку стотини инвертери на граѓани кои дома нееколошки се греат или садењето на исто толку дрвца не го решаваат големиот здравствен проблем.
И што е најважно, ова не е тема само за време на магли, туку за секој ден во годината. Само така вистински ќе се ослободиме од отровниот воздух.
