Најголемите имиња од американската технолошка индустрија во четврток треба да вечераат со американскиот претседател Доналд Трамп и кинескиот претседател Си Џинпинг во Белата куќа.
Меѓу најавените гости се Илон Маск, Сем Алтман, Џенсен Хуанг, Сундар Пичаи, Џеф Безос, Тим Кук, Мајкл Дел и Џејн Фрејзер, додека се очекува да присуствува и Сатја Надела.
Си утре пристигнува во тридневна државна посета на САД, што ќе биде негова прва државна посета на Вашингтон од 2015 година. Трамп лично треба да го пречека кинескиот претседател во воената база „Џоинт бејс Ендрјус“, а во четврток ќе следуваат официјална церемонија, разговори и државна вечера.
Во центарот на разговорите се очекува да бидат трговијата, вештачката интелигенција, напредните полупроводници и кинескиот извоз на ретки земни елементи. Токму компаниите предводени од дел од гостите се во средиштето на американско-кинеското ривалство околу АИ, чиповите, електричните автомобили и глобалните синџири на снабдување.
Сè уште не е познат конечниот состав на кинеската бизнис-делегација, а меѓу компаниите чие присуство се разгледува се БИД, „Шаоми“, ЦАТЛ и „Гоушн“.
Средбата доаѓа во период на американски ограничувања за пристапот на Кина до најнапредните чипови и обиди на Пекинг да го забрза развојот на сопствената технолошка индустрија.
Посетата на Си завршува во петок, кога е предвидена и дополнителна програма во Вашингтон со Трамп и нивните сопруги.
