Британската полиција трага по сторителите на необична кражба, откако од магацин во близина на Ливерпул биле украдени околу 40.000 литри пиво „Гинис“, чија вредност се проценува на околу 155.000 американски долари.
Кражбата се случила вечерта на 31 август во индустриска зона во Ранкорн, во северозападниот дел на Англија. Според полицијата на Чешир, двајца возачи пристигнале со камиони и ги одвлекле двете приколки натоварени со познатото ирско темно пиво.
Во приколките се наоѓале околу 800 буриња „Гинис“, наменети за снабдување на пабови, додека самите приколки биле проценети на дополнителни 67.000 долари.
„Позната е изреката дека ‘Гинис’ е добар за вас, но тоа важи само кога пивото е купено и платено“, изјавил детективот Гери МекКлачи, нагласувајќи дека полицијата ќе направи сè за да ја пронајде и врати украдената стока.
Случајот потсетува на сличен инцидент во САД, каде пред неколку недели од магацин во Јужна Калифорнија беа украдени околу 34.000 лименки пиво „Пабст Блу Рибон“, вредни околу 70.000 долари.
Тогаш производителот понуди награда од 20.000 долари за информации што ќе помогнат во пронаоѓањето на украденото пиво.
Британските власти ја продолжуваат истрагата и апелираат до граѓаните кои имаат информации за украдените приколки или нивната содржина да се јават во полиција.
