Турски суд одреди притвор за поранешната министерка за семејство и социјална политика и висока функционерка на владејачката АК партија, Фатма Бетуел Сајан Каја, во рамки на истрага поврзана со финансиската криза што ги погоди инвестициските фондови во земјата.
Одлуката ја донел суд во Истанбул, а Каја е осомничена за прекршување на Законот за пазар на капитал и за членство во организација формирана со цел извршување кривични дела, пренесува агенцијата Анадолија.
Каја, која беше министерка во периодот од 2016 до 2018 година, во септември поднесе оставка од функцијата потпретседател на АК партијата и потоа ја напушти партијата.
Истрагата следува по финансиските потреси во инвестицискиот сектор, по што опозициски политичар ја обвини Каја дека остварила значителен профит од продажба на акции непосредно пред кризата и падот на берзата.
Турските власти продолжуваат со проверките поврзани со движењата на капиталот и можните злоупотреби во периодот пред финансиските турбуленции.
