Републичката изборна комисија (РИК) едногласно ги потврди конечните резултати од изборите за пратеници во Собранието на Србија, според кои најголема поддршка добила листата „Студентска листа – Студентите победуваат“.
Според усвоените податоци, студентската листа освоила 2.354.417 гласови, што ѝ обезбедува 140 пратенички мандати во новиот состав на Народното собрание.
Листата „Александар Вучиќ – Обединета Србија“ освоила 1.731.323 гласови и ќе има 103 пратеници во парламентот.
Во новиот состав на Собранието ќе влезат и седум пратеници избрани од листите на националните малцинства.
Со официјалното усвојување на вкупните изборни резултати започнаа да течат законските рокови за формирање на новиот парламентарен состав. Новото Собрание треба да биде конституирано најдоцна во рок од 30 дена од објавувањето на конечните резултати.
Согласно изборното законодавство, РИК во рок од 10 дена од објавувањето на вкупниот извештај треба со решение да им ги додели мандатите на избраните кандидати, според редоследот на нивните изборни листи.
Конечната потврда на пратеничките мандати ќе биде извршена на првата седница на Народното собрание, врз основа на извештајот на Републичката изборна комисија за спроведените избори.
