Полските разузнавачки служби привеле шест лица под сомнение дека набавувале компоненти за производство на оружје и муниција, кои потоа биле испраќани во Русија, соопштија локалните власти.
Меѓу приведените се 37-годишна руска државјанка и петмина полски државјани на возраст од 25 до 52 години, информираше министерот задолжен за координација на разузнавачките служби, Томаш Сјемонијак.
Според полските медиуми, акцијата ја спровела Агенцијата за внатрешна безбедност (АБВ), при што биле извршени претреси на 21 локација во три региони во периодот од 21 октомври до 2 ноември.
Осомничените се товарат дека набавувале различни компоненти што можат да се користат за производство на оружје и муниција, а потоа ги препродавале во Русија.
Полското обвинителство отворило истрага за сомневање за членство во организирана криминална група, а четворица од осомничените дополнително се товарат и за шпионажа.
Полска, како членка на Европската Унија и НАТО, е меѓу најголемите поддржувачи на Украина по руската инвазија. Варшава во повеќе наврати предупредуваше дека руските и белоруските разузнавачки структури се обидуваат да воспостават мрежи на влијание на нејзина територија.
