Американскиот претседател Доналд Трамп повторно ја поддржа изградбата и развојот на дата центрите, оценувајќи дека тие се клучни за глобалната конкуренција во областа на вештачката интелигенција.
Трамп предупреди дека ограничувањето на технолошките инвестиции во САД може да ѝ овозможи на Кина да ја преземе водечката позиција во развојот на новите технологии.
„Толку многу пари можат да се заработат за Охајо. Не можете едноставно да ги исклучите. Тие ќе одат во Кина“, изјави Трамп на предизборен собир во Вандалија, во сојузната држава Охајо.
Темата за изградбата на дата центри стана едно од клучните прашања во политичките дебати во Охајо, каде што технолошките проекти се поврзуваат со економскиот развој, но и со прашања за енергетската потрошувачка и влијанието врз локалните заедници.
Трамп посочи дека овие објекти обезбедуваат огромна компјутерска моќ потребна за развој и функционирање на системите за вештачка интелигенција, кои тој ги опиша како „суперинтелигенција“.
Според американскиот претседател, вложувањата во дата центрите претставуваат стратешка инвестиција за иднината на американската технологија и економија.
