Македонскиот фудбал е завиен во црно по веста за смртта на Агрон Мемеди, поранешен фудбалер, репрезентативец и тренер, кој остави длабока трага во домашниот фудбал, особено во редовите на Шкендија и Ренова.
Мемеди е роден на 5 декември 1980 година во Тетово, а својата фудбалска кариера ја започна токму во Шкендија. Подоцна премина во Ренова, каде што ги оствари најголемите успеси како играч.
Со тимот од Џепчиште ја освои шампионската титула во Првата македонска фудбалска лига во сезоната 2009/2010, а една година подоцна триумфираше и во Купот на Македонија. Во текот на кариерата настапуваше и за Металург, а забележа и еден настап за сениорската репрезентација на Македонија.
По завршувањето на активната играчка кариера во јануари 2018 година, Мемеди остана во фудбалот и се посвети на тренерската работа. Најпрво ја предводеше Ренова, а потоа работеше со младинските категории во академијата на Шкендија, помагајќи во развојот на бројни млади фудбалери.
Од август 2026 година беше дел од стручниот штаб на првиот тим на Шкендија, каде што ја извршуваше функцијата помошник-тренер на Артим Положани.
Со неговото заминување, македонскиот фудбал загуби човек кој целиот свој живот го посвети на спортот – најпрво како успешен фудбалер, а потоа и како тренер кој несебично го пренесуваше своето знаење на новите генерации.
По повод неговата смрт, ФК Шкендија упати телеграма со сочувство до неговото семејство, пријателите и сите кои имаа можност да соработуваат со него.
