Жителите на населбата Каменик во Општина Кисела Вода ќе добијат нов систем за водоснабдување, како дел од заеднички проект на локалната самоуправа и Владата.
Премиерот Христијан Мицкоски при посетата на терен најави дека со реализацијата на проектот конечно треба да се реши долгогодишниот проблем со обезбедување вода за пиење за жителите на овој дел од општината.
„Како што вчера најавив, полека, проект по проект ќе ги завршуваме, но и проект по проект оние коишто не се почнати ќе ги отпочнуваме“, изјави Мицкоски, посочувајќи дека станува збор за проект во кој заеднички учествуваат Владата и Општина Кисела Вода.
Според него, приоритет е поставувањето на подземната водоводна инсталација, а по завршувањето на тие работи ќе следува и реконструкција на патната инфраструктура.
„Откако ќе биде завршена оваа подземна инсталација, следен чекор е да го поминеме и патот со нов асфалт“, рече премиерот.
Мицкоски нагласи дека проектите се реализираат според утврдени приоритети и дека целта е да се одговори на потребите на граѓаните.
„Плански се работи, систематски се работи, потребите се јасни, а ние како Влада нашата задача и цел е да одговориме на тие потреби согласно нашите можности“, порача тој.
Премиерот упати благодарност до градоначалничката на Кисела Вода, општинските советници, пратениците, Владата и Министерството за животна средина и просторно планирање, посочувајќи дека проектот е резултат на соработка меѓу повеќе институции.
Од Владата очекуваат дека со изградбата на водоснабдителниот систем и последователното асфалтирање ќе се подобрат условите за живот на жителите на Каменик и ќе се реши еден од најзначајните инфраструктурни проблеми во оваа населба.
