Три лица се лишени од слобода, а против шест физички и три правни лица е поднесена кривична пријава во рамки на голема полициска акција спроведена во Скопје, поради сомнение за проневера во службата, перење пари и несовесно работење во службата.
Акцијата ја реализирале полициски службеници од Одделот за сузбивање на организиран и сериозен криминал, во координација со ОСПО-ЕБР и по наредба на Основното јавно обвинителство за гонење на организиран криминал и корупција.
При претресите на повеќе локации во Скопје биле приведени С.С. (49), Ш.С. (29) и З.Ѓ. (58), а биле запленети околу 27.735 евра, 38.500 денари, 750 швајцарски франци, 100 американски долари, повеќе мобилни телефони и две патнички возила.
Според истрагата, С.С., сопственик и управител на компанија од село Кучевиште овластена за технички преглед на возила, во периодот од 2021 до 2026 година изготвувал и доставувал лажни извештаи за наплатени надоместоци при регистрација на возила. На тој начин, според МВР, се стекнал со противправна имотна корист од 138.877.419 денари, односно околу 2,26 милиони евра.
Во незаконските активности, според полицијата, учествувал и Д.М. (54), кој како раководител на станица за технички преглед бил задолжен за изготвување фактури и доставување извештаи до надлежните институции.
Истрагата покажала дека дел од средствата биле пренасочувани преку осигурително брокерско друштво, иако на неговите сметки требало да се уплаќаат само средства поврзани со осигурителни полиси.
Осомничените Ш.С. и З.Ѓ., како извршни членови на Одборот на директори во брокерското друштво, според МВР, биле запознаени со потеклото на средствата и заедно со С.С. преземале активности за прикривање на нивното потекло преку трансакции, позајмици и купување недвижности.
Во случајот е опфатена и Т.М. (64), помошник-директор за финансии во Јавното претпријатие за државни патишта, која, според истрагата, не го извршила потребниот надзор врз уплатите и извештаите, овозможувајќи му на С.С. противправно да присвои 48.434.406 денари по основ на патна такса.
Кривична пријава е поднесена и против М.Д. (40), овластен сметководител, кој, според полицијата, внесувал невистинити податоци во сметководствената документација и поднесувал даночни пријави и годишни сметки што не ја прикажувале реалната финансиска состојба на компанијата.
Според МВР, со ваквото незаконско работење биле проневерени вкупно 138.877.419 денари, односно околу 2,26 милиони евра. Од оваа сума, 48,4 милиони денари се на штета на Јавното претпријатие за државни патишта, 1,48 милиони денари на Црвениот крст, 5,58 милиони денари на Министерството за животна средина, додека повеќе од 83 милиони денари се однесуваат на Буџетот и на комуналните такси на општините.
Против сите осомничени лица и правни субјекти е поднесена кривична пријава до Основното јавно обвинителство за гонење организиран криминал и корупција.
