Пожарникарите од Територијалната противпожарна единица Велес синоќа, по повеќечасовна интервенција, успешно го локализираа и изгаснаа пожарот што избувна во месноста Прцорек, во близина на базенот за вода.
Дојавата за задимување била примена во 17:50 часот, по што на терен веднаш било испратено едно противпожарно возило со екипа пожарникари.
По пристигнувањето било утврдено дека пожарот е во развиена фаза, поради што била побарана дополнителна помош. На местото на настанот било испратено уште едно противпожарно возило со втора екипа.
По околу три часа борба со огнената стихија, пожарот бил целосно изгаснат околу 21:00 часот, при што било спречено неговото понатамошно ширење.
Од Територијалната противпожарна единица Велес повторно апелираат до граѓаните да не палат оган на отворен простор, особено во период на високи температури и зголемен ризик од пожари.
Воедно, доколку забележат пожар, граѓаните веднаш да се јават на бесплатните телефонски броеви 193 или 112.
