Со вечерашниот натпревар во Струмица беше комплетирано четвртото коло од машката кошаркарска Суперлига, а домашниот состав приреди големо изненадување, совладувајќи го актуелниот шампион МЗТ Скопје со 87:79.
Кошаркарите на МЗТ подобро го отворија натпреварот и рано стекнаа предност од осум поени, но домаќините брзо се вратија во игра, па првата четвртина заврши нерешено – 26:26.
Во втората делница Струмица заигра поагресивно во одбраната и со подобра реализација успеа да замине на голем одмор со водство од 47:44.
Третата четвртина донесе израмнета игра и постојани промени во резултатот. Гостите од Аеродром ја анулираа негативата и пред последниот период резултатот беше израмнет – 64:64.
Решавачките десет минути целосно им припаднаа на струмичани. Со серија успешни напади и цврста одбрана тие ја добија последната четвртина со 23:15 и стигнаа до заслужена победа. На помалку од две минути до крајот, домашниот тим ја достигна и највисоката предност од 12 поени.
Најефикасен кај победникот беше Џејкобс со 29 поени, додека Крафорд додаде 21. Во редовите на МЗТ Скопје најдобар стрелец беше Војдан Стојановски со 17 поени.
По четири одиграни кола, Струмица има биланс од две победи и два порази и се наоѓа на петтата позиција на табелата. МЗТ Скопје го запиша првиот пораз сезонава и со скор 3-1 падна на третото место, израмнет со Кожув. Единствен тим со максимален учинок останува Работнички.
