Градоначалничката на Општина Кисела Вода, Бети Стаменкоска-Трајкоска, учествуваше на јавно-приватен дијалог кој ги собра претставниците на локалните институции, бизнис-секторот и младите од општината, со цел отворање на теми поврзани со подобрување на деловното опкружување и јакнење на антикорупциските механизми.
Настанот беше организиран во рамки на проектот за мобилизирање на малите и средните претпријатија како лидери против корупцијата, чиј организатор и кофинансиер е Фондацијата „Конрад Аденауер“, во соработка со Европската Унија.
Во фокусот на дискусијата биле предизвиците со кои се соочуваат компаниите на локално ниво, особено во делот на транспарентноста, јавните набавки и административните процедури. Учесниците размениле искуства и предлози кои треба да придонесат за креирање препораки за подобрување на локалните политики и унапредување на механизмите за спречување на корупцијата.
Стаменкоска-Трајкоска порача дека создавањето стабилна и стимулативна бизнис-средина мора да се темели на владеење на правото, транспарентност и еднакви услови за сите.
„Корупцијата не е само изолиран предизвик, туку сериозна пречка за економскиот напредок, ја нарушува лојалната конкуренција и ја намалува довербата на граѓаните. Нашиот одговор мора да биде бескомпромисно законско работење и целосна транспарентност“, истакна градоначалничката.
Таа нагласи дека Општина Кисела Вода има воспоставено Совет на стопанственици преку кој директно се слушаат потребите и предлозите на деловниот сектор.
„Силна бизнис-заедница значи реална можност за кариерен развој, финансиска стабилност и мотив младите да го градат својот живот тука, во својата земја“, додаде Стаменкоска-Трајкоска.
На настанот свои обраќања имаа и претседателката на Здружението на бизнис-жени, Валентина Дисоска, како и претставникот на Фондацијата „Конрад Аденауер“, Александар Цеков, кои ја истакнаа важноста од заедничко делување на институциите, компаниите и граѓанскиот сектор.
Во завршниот дел беше најавено дека претставниците на малите и средните претпријатија ќе можат да посетуваат бесплатна обука и да се стекнат со сертификатот „Бизнис со интегритет“.
